Sithree "Cey" van Heydoorn, Minister di Enseñansa, Siensia, Kultura i Deporte.

Komo gobièrnu nos semper a duna idioma un papel primordial den nos maneho, seguramente den e deliberashonnan pa yega na e “Landenpakket” di enseñansa na nivel di reino. Ami komo Minister di Enseñansa, Siensia, Kultura i Deporte (ESKD) ta porlotantu orguyoso di por presentá e resultado di un trayekto ku a kuminsá basta tempu pasá.

E realisashon di Instituto Nashonal di Idioma ta parti di un proseso. Pa nos por a yega asina leu, gobièrnu a fiha un Maneho di Idioma na 2015, pa nos sa unda nos ta bai i ki direkshon nos ke sigui komo pais. Na 2017 gobièrnu a indiká kon ta bai ehekutá e maneho. Ministerio di ESKD a desaroyá despues un plan di akshon pa realisá e organisashon nobo. Ami a tuma e desishon pa transformá loke tin i no kuminsá ku un fundashon nobo.

A sera Fundashon Material pa Skol (FMS) na 2023. A pasa produkshon di material, ekspertisio i konosementu di papiamentu pa Fundashon pa Planifikashon di Idioma (FPI). Despues a sigui e proseso pa transformá FPI den Instituto Nashonal di Idioma Curaçao (INIC).

Entretantu a adaptá statutonan di FPI na eksigensianan di bon gobernashon, a deskribí i yena funshonnan nobo mientras gobièrnu a aloká fondo pa hasi e transformashon posibel. Sindikato na su turno a koperá pa yega na un plan sosial aseptabel.

E transformashon di FPI pa INIC mester krea kondishon pa den añanan benidero nos logra ehekutá un maneho inklusivo i inovativo pa nos lenganan ofisial di pais: papiamentu, hulandes i ingles, anto alabes alsa konosementu di spañó.

pap_CURPAP