Lenga di seña ta uni nos!

Anualmente mundu henter ta reflekshoná riba importansia di idioma pa hende surdu durante Siman Internashonal di Surdu, ku ta tuma lugá den e delaster siman di sèptèmber. Riba e dia akí ta trata ademas pa konsientisá personanan ku no ta surdu pa para ketu i pensa kon difísil bida ta den un mundu kaminda zonidu ta un aspekto esensial pa komunikashon.

Nos por komuniká ku persona ku problema di oido, ku bista. Sea ta wak e persona den kara i artikulá korektamente, skirbi loke nos ke bisa ku frasenan kòrtiku i laga nan lesa, òf usa lenga di seña. Lenga di seña ta un idioma visual ku hende surdu ta usa pa komuniká. Ta hasi seña ku man den kombinashon ku mirada i mímika. Lenga di seña ta usa un álfabèt manual tambe. Ku man ta traha 26 seña ku ta representá e 26 lèternan di álfabèt.

Meskos ku tin diferensia den lenganan manera papiamentu, hulandes, ingles ku spañó, den lenga di seña tambe tin diferensia. Pues lenga di seña no ta universal.

Promé ku 1996 nos na Kòrsou tabata usa American Sign Language (ASL). Despues nos a kuminsá usa Nederlandse Gebarentaal (NGT). NGT ta un lenga ofisial na Hulanda. Na Kòrsou skol Myrna Dovale ta usa lenga di seña basá riba NGT, ku apoyo di Papiamentu komo idioma oral (Papiamentu ku Seña). Lenga di seña porlotantu ta un di nos lenganan den enseñansa.

Instituto Nashonal di Idioma (INIC) ta mira e fecha di 23 di sèptèmber komo un dia pa sostené i protehá identidat lingwístiko i diversidat kultural di hende surdu i otro usuarionan di lenga di seña na Kòrsou. P’esei nos ke selebrá e dia akí den futuro huntu ku komunidat di hende surdu i esnan ku tin oido. Asina nos por yuda individuonan ku problema di oudishon pa krese den nan konosementu kognitivo, abilidatnan sosial i krea mas posibilidat pa nan komuniká tantu ku otro, komo ku sosiedat en general.

INIC a lanta un komishon pa kontribuí ku komunidat di surdu pa den un esfuerso kolektivo ku Stichting Hulp aan Auditief Gehandicapten (HAG) / Fundashon Hendikèp Ouditivo, gobièrnu i organisashonnan sivil pa, man na man, promové, rekonosé i stima lenga di seña komo un di nos lenganan na Kòrsou.