Koperashon ku e Archipiélago di San Andrés, Providencia & Santa Catalina

Dianan 11, 12, 13, 14 di desèmber 2022, un delegashon di Archipélago of San Andres, Providencia & Santa Cathalina, Colombia ta bishitá nos isla. E delegashon ta konsistí di e Governador di e isla (Everth Hawkins Sjogreen), e sekretario di edukashon (Lucila Morelos Páez) i su komitativa (Gene Ogiste: direktor Kalidat Edukativo, Ministerio di Edukashon, Ricardo Gordon eksperto pedagógiko; Fressman Avila, kordinadó general i David Cardona: kordinadó akadémiko).

Na e islanan akí un parti di e poblashon ta papia Creole i nan ta siña spanó i ingles na skol. Un komunidat trilingwe, komparabel ku esun di nos, pero ku awor ta bai kuminsá ku e proseso pa introdusí Creole den edukashon. Nan ophetivo tabata pa siña di nos proseso pa yega na un maneho di idioma i e papel di Papiamentu i e lenganan stranhero den dje.

E delegashon a bishitá e tres skolnan di Fundashon Skol Humanista na Papiamentu (FSHP), Kolegio Elis Juliana (DOS) i Kolegio Santa Famia (RK) ku a keda skohé den koperashon ku e direktivanan di skol konserní. Un representante di FPI/NTIC i representantenan di Ministerio di Enseñansa tambe tabata presente. A tuma tambe tempu pa e delegashon profeshonal opservá un les i papia ku dosente i hiba kòmbersashon ku otro ekspertonan den enseñansa. Durante e promé bishita akí a duna ademas atenshon na aspektonan kultural ku tabata na enkargo di Departa-mentu di Kultura.

Nan e promé bishita kaba e gobernador a ekspresá e idea pa Kòrsou i e Archipiélago di San Andrés yega den futuro serkano na un forma di koperashon struktural pa siña di otro i sostené otro den e proseso pa inovashon di idioma den enseñansa.

Interkambio di dosente: 2023

Di 8 pa 12 di mei 2023 un di dos delegashon, e biaha akí di dosente, ta hasi nos un bishita. Ta bin 5 dosente huntu ku 2 representante di Ministerio di Edukashon. Nan deseo tabata pa bishitá e mesun skolnan di biaha pasá, pero e biaha akí ku mas tempu pa opservá lès, interkambiá ku dosente i ku kabesnan di skol.

Durante e dianan di interkambio e grupo a bishitá De Springplank, na SGO Otrabanda, kaminda ta akohé mucha di diferente nashonalidat i prepará nan pa drenta despues skolnan sekundario regular, ku ta na hulandes.

Dia internashonal di Idioma materno: 2024

Banco de la Republica di Colombia ta invitá direktor di NTIC pa duna un charla na okashon di Dia internashonal di Lenganan materno pa komunidat di San Andrés. Sra. Dijkhoff ta duna e dia ei un bista di Maneho di idioma di Kòrsou i di loke nos pais a logra den e añanan tras di lomba. Enfasis ta riba e manera ku nos a atendé ku maneho di idioma, generando promé un base di konsenshi den e poblashon, siguí pa fiha uso di Papiamentu den lei, traha un kuríkulo i programa pa Papiamentu komo materia, prepará dosente i finalmente produsí material di skol.

Ademas a duna un bista di e desaroyo ku Papiamentu mes mester a pasa aden promé ku el a bira un lenga ofisial: desishonnan polítiko relashoná ku aseptashon di ortografia fonológiko (Boneiru i Kòrsou) i etimológiko (Aruba) i desintegrashon di Antia. Despues e kreashon di e dos institutonan ku a traha na material pa Papiamentu: Sede di Papiamentu i despues Fundashon Planifikashon di Idioma (FPI) i Fundashon Material pa Skol (FMS) i e último desaroyonan ku a kulminá den un Plan di organisashon i realisashon di Fundashon Nashonal di Idioma.

Finalmente a duna atenshon na e manera ku nos ta atendé ku desaroyo di Papiamentu komo lenga materno i e lenganan stranhero hulandes, ingles i spañó.

2024: Retonan di Edukashon pa Avansá den e siguiente kuater aña

Dia 17 i 18 di sèptèmber e direktor di Kalidat Edukativo di Ministerio di Edukashon, Gene Ogiste, ta hasi un petishon na INIC pa sostené nan durante nan konferensia anual, kaminda gobièrnu lo duna nan bista tokante futuro di edukashon na e Archipélago. E petishon tabata pa duna un tayer na dosentenan lokal i presentá, den un konferensia kaminda tur aktornan di e isla a partisipá, un charla pa destaká e importansia di idioma materno den enseñansa.

Puntonan importante ku a keda tresé dilanti tabata:

• E echo indiskutibel ku un lenga materno ta un ekosistema ku ta di importansia pa komunikashon i identifikashon di e pueblo hablante.
• E forma den kua un lenga materno ta definí i determiná un hende su kultura, norma, balor i finalmente su personalidat;
• E diskrepansia entre derechinan lingwístiko universal i e realidat Karibeño ku nan, nos i otro hablantenan di lenga krioyo ta konfrontá;
• E reperkushon di esaki den nos sistemanan di enseñansa;
• E transformashon ku lo tuma lugá tantu den komunidat, serka e alumno i maestro, pero tambe entre e hablantenan mes, ora un alumno haña instrukshon den e lenga ku e ta bin kuné for di kas;
• Finalmente a duna algun rekomendashon basá riba e eksperiensia ekstenso ku Sr. Dijkhoff tabatin den su karera aki na Kòrsou i su trabounan den komunidatnan pafó di Kòrsou manera Aruba i Boneiru, Haiti, Sürnam, Jamaica i Guyana.

Plannan pa futuro

For di 2022, e gobernador di Archipélago di San Andrès i Minister di Enseñansa, Siensia, Kultura i Deporte a ekspresá e deseo pa yega na un koperashon struktural, a traves di un Memorandum of Understanding (MOU). Den e MOU lo a fiha un akuerdo di koperashon entre e paisnan pa sostené otro den e proseso pa yega na un mihó kalidat di enseñansa pa nan lenganan materno respektivo i e lenganan ku pa tur dos ta lenganan stranhero, esta spañó i ingles.