Kolaborashon entre INIC i INT

Dia 21 i febrüari 2024 nos a firma un memorandum di entendimentu ku Instituut voor de Nederlandse Taal (INT). E kolaborashon ta dirigí riba ampliashon di infrastruktura di data leksikal pa papiamentu.

Nos komo un órgano ehekutivo di maneho di idioma ‘Riba kaminda pa ko-eksistensia multilingual’ ta responsabel pa standarisashon, kòrpus i leksikografia di Papiamentu. INT, establesé na Leiden, Hulanda, ta responsabel pa infrastruktura digital di idioma pa henter e region di abla hulandes. Konhuntamente nos lo traha na desaroyo di Papiamentu. Ta trata aki di:

  1. Digitalisashon di dato leksikal den Papiamentu. Krea un infrastruktura digital na benefisio di desaroyo di dikshonarionan digital.
  2. Integrashon di infrastruktura di idioma di Papiamentu huntu ku infrastruktura di dato di idioma eksistente di INT, kaminda investigadó i usuarionan ta haña akseso amplio na un seri di fuente di idioma. Investigadónan di papiamentu por amplia nan konosementu i ekspertisio hasiendo uso di diferente programa eksistente desaroyá pa INT.

Ambos instituto lo kompartí konosementu pa loke ta regardá desaroyo di banko di data leksikal digital, ku atenshon spesial pa enfoká riba proyektonan di komunidat lingwístiko di papiamentu, manera e tareanan di komishon di standarisashon. Banda di esei lo tin desaroyo profeshonal i profeshonalisashon pa trahadónan di INIC ku ta involukrá ku desaroyo i maneho di infrastruktura di idioma.

E kolaborashon akí ta marka un paso importante dilanti den fortifikashon di infrastruktura di idioma di Papiamentu. E komishon di standarisashon lo por usa e banko di dato akí den relashoná ku koperashon entre islanan ABC.

 
 
 
 
 
 
 
 
 
 
 
 
pap_CURPAP