Alvin Gerald Stacie, Presidente di Hunta di Komisario

Es ku domin’é lo sa di apresié

Ku e frase akí, ku ta parti di letranan di e kansion Esta Dushi Lenga di Rignald Recordino (Doble R), mi ke indiká ku apresio di nos dushi lenga Papiamentu ta inkluí e responsabilidat pa bo hasi esfuerso pa domin’é. Pa nos dominá nos lenga, nos mester eduká nos mes sí. E dos fundashonnan ku mi a presidí, Fundashon Material pa Skol (FMS) i Fundashon pa Planifikashon di Idioma (FPI) tabata krea e kondishonnan pa siñamentu di nos lenga materno por tuma lugá. Nan trabou tabata pa sostené gobièrnu, direktivanan di skol, dosente i públiko en general pa logra un mihó dominio di Papiamentu.

Sinembargo na desèmber 2021 Minister van Heydoorn a invitá mi pa pasa serka dje den e edifisio ku NTIC ta okupá awor akí na Schottegatweg Oost. Huntu nos a konkluí ku FMS i FPI su situashon tabata hopi malu. FMS tabata finansieramente fayit, pasobra e tabatin mas debe ku bienes i likides. FPI tabatin fondo, pero e no tabata operashonal. Algu mester a pasa.


Pa FMS nos mester a:

  • Parti e bienes di FMS ku SIGE;
  • Transferí tur trahadó di FMS pa FPI òf SIGE.


Pa FPI mester a:

  • Reaktivá e instituto i integrá e operashonnan di FMS den FPI;
  • Aloká trahadónan di FMS den FPI;
  • Realisá finalmente un instituto nashonal.


Minister van Heydoorn no a puntra si mi ta disponibel pa dirigí e proseso akí. El a puntra mi “Ki dia nos ta start?”. Nos a akordá tres punto prinsipal di akshon: likidá FMS, transformá FPI den INIC i loke ta mas importante: niun empleado lo no a pèrdè nan trabou. Den e mesun rosea minister, ku un kara serio, a partisipá mi ku mi tin un aña pa realisá esaki. Komo un bon fanátiko di Tom Cruise i prinsipalmente di su pelíkula ‘Mission Impossible’, mi a aseptá e reto akí. Ku yudansa, kooperashon i lucha di sr. Plantijn di Sitek i tin ora ku intervenshon di minister van Heydoorn durante e proseso, nos a keda kla.

Pa ehekutá e reto akí nos a apuntá dr. Marta Dijkhoff pa realisá e transishon deseá. Marta a integrá eks-trahadónan di FMS den INIC i ku sosten i trabou eksepshonal di tur e empleadonan di INIC, a logra nos ku dia promé di desèmber, 2 aña despues di mi enkuentro ku minister van Heydoorn, di hasi e apertura di INIC, den e mésun edifisio ku 2 aña pasá, mi a tuma e enkargo akí.

No a apuntá mi pues pa mantené tur hende kontentu. Sí, nos a diskutí fuerte ku e diferente partidonan envolví, tin biaha asta diskushon a resultá den pleitu, pasobra mester a tuma desishonnan difísil pa drecha loke a bai robes den pasado. Mi a siña ku mester pone hende adekuá na kabes pa manehá un fundashon, pero mester tin tambe supervishon pa kosnan kana di manera korekto. Gobièrnu a siña ku nan mester ta mas estrikto ku fundashonnan pa loke ta e obligashon pa kumpli ku reglanan vigente i nan mester hala orea di dirigentenan di un fundashon promé ku kos bai for di man. Nos mester ehersé mas kòntròl, teniendo kuenta ku fundashonnan ta usa plaka di pueblo.

Pa konkluí na nòmber di mi direktiva kompleto: Muriel Meyer, Hugo Lew Jen Tai, Sharine Isabella, Leonard Coffie i Giandro Ignacio, mi ta invitá boso pa apoyá i sostené Instituto Nashonal di Idioma Curaçao: buska kaminda pa siña mas di nos lenga, sa di apresié i yega na nos portanan pa asina abo i ami kontribuí na alsa nos dushi lenga Papiamentu.

pap_CURPAP